Наце Буѓони - Општинско Средно Техничко Училиште » Патронат

Замени ја улогата

Davor Jordanovski — Tue, 20 Oct 2026 18:58:45 +0000

# Креативност, знаење и тимски дух во работилниците по повод патрониот празник на ОСТУ „Наце Буѓони“ – Куманово По повод патрониот празник на ОСТУ „Наце Буѓони“ – Куманово, беа организирани повеќе едукативни и креативни работилници, во кои активно учество зедоа голем број ученици од македонските и албанските паралелки. Дел од учениците со посветеност учествуваа во подготовката на активностите, додека останатите имаа можност да ги покажат своите знаења, способности и креативност преку решавање на различни задачи.
Првата работилница, насловена *„Замени ја улогата“*, им овозможи на учениците да излезат од рамките на својата струка и да се запознаат со знаењата и предизвиците на другите образовни профили. Учениците од електротехничката струка одговараа на прашања од машинството и медицината, машинците решаваа задачи од електротехниката и медицината, додека учениците од медицинската струка ги проверуваа своите знаења од електротехниката и машинството. Преку практични вежби, интересни прашања и креативни предизвици, учесниците учеа на несекојдневен начин, развивајќи љубопитност, логичко размислување и меѓусебна соработка.
Втората работилница, *„Кој најдобро го познава училиштето?“*, беше посветена на препознавање на различни делови и простории во училишната зграда. Врз основа на фотографии со карактеристични детали, учениците требаше да утврдат каде се наоѓаат прикажаните места и со точни одговори да докажат колку добро го познаваат училиштето. Активноста внесе дополнителна возбуда, поттикнувајќи ја внимателноста, концентрацијата и натпреварувачкиот дух кај учесниците. Преку овие работилници, учениците имаа можност да учат преку искуство, да ги споделуваат своите знаења и да ги зајакнуваат меѓусебните врски во училишната заедница. *ОСТУ „Наце Буѓони“ – Куманово* континуирано се стреми кон создавање современа и поттикнувачка образовна средина, во која секој ученик добива можност да ги развива своите потенцијали, таленти и способности.

Со посветеноста на наставниот кадар и активното учество на учениците, училиштето гради вредности засновани врз знаење, професионалност, почитување и заедништво. Горди на својата традиција и насочени кон иднината, во ОСТУ „Наце Буѓони“ се негува духот на соработката, креативноста и стремежот кон постојано усовршување, потврдувајќи дека училиштето не е само место каде што се стекнува знаење, туку и средина во која се создаваат успешни млади луѓе и се градат темелите на иднината.

Шаховски турнир по повод патрониот празник на ОСТУ „Наце Буѓони“ – Куманово

Davor Jordanovski — Tue, 20 Oct 2026 18:54:29 +0000

*Шаховски турнир по повод патрониот празник на ОСТУ „Наце Буѓони“ – Куманово*

На 15 октомври 2026 година, по повод патрониот празник на ОСТУ „Наце Буѓони“ – Куманово, се одржа шаховски турнир на кој учествуваа 28 ученици. Преку повеќе кола на натпреварување, учениците ги покажаа своите логичко размислување, концентрација, трпеливост и стратегиски способности.

Во второто коло продолжија 14 натпреварувачи, а најуспешните се изборија за пласман во завршницата на турнирот.
Конечниот пласман беше следниот:
Прво место – Бодан Курчински
Второ место – Лео Митевски
Трето место – Петар Станковски
Четврто место – Ангел Димковски

ОСТУ „Наце Буѓони“ посветува особено внимание на интересите и талентите на своите ученици, препознавајќи ја важноста на нивниот развој и надвор од редовната настава.

Преку ваквите активности, училиштето ги поддржува, охрабрува и мотивира младите да ги развиваат своите способности, да ја градат самодовербата и да се стремат кон нови успеси. Горди сме на заинтересираноста, ангажираноста и ентузијазмот на нашите ученици, кои се поттик за продолжување на активностите што го збогатуваат училишниот живот и создаваат можности за лична афирмација и развој.

Наце Буѓони – Биографија

Јелена Димовска — Sun, 11 Oct 2015 13:04:49 +0000

Наце Кралев Ивановски – Буѓони е македонски комунист, учесник во НОВ. Роден е во 1919 година во Белановце, Куманово. Потекнува од сиромашно работничко семејство. По завршувањето на основното училиште, во 1932 година го изучил ковачко-коларски занает. Во 1935 година го завршил занаетчиското училиште.

Во 1934 година се вклучил во напредното работничко движење кога станал и член на Металската синдикална подружница. Се дружел со напредни младинци од градот и станува постојан посетител на Работничкиот дом каде за првпат слушнал за експлоатацијата на работниците. Читал работнички весници и напредна литература, посебно книги со социјална тематика. Истата година станал член на воспитно-младинската група. Во работничкиот дом ги посетувал предавањата и ги слуша разговорите на постарите комунисти и оние што раководеле со Урсовите синдикати во градот. Во 1938 година станува член на СКОЈ и член на скоевската група раководена од Боро Петрушевски- Папучар.Работел на придобивање млади луѓе и нивно вклучување во напредното движење, особено меѓу чираците и калфите од градот и селата.

Во 1938 година на денот на парламентарните избори зел учество на демонстрациите, а во 1940 година учествувал во акцијата за пишување пароли во градот, организирана од Месниот комитет на Партијата. Поради тоа бил затворен, но наскоро ослободен поради недостиг на докази. Учествувал во повеќе акции, вперени против Љотиќевската фашистичка организација.

По окупацијата на Македонија во 1941 година учествувал во поедини акции организирани од Партиска организација, како на пример: во уништувањето на архивата на административно-полицискиот апарат на Кралството Југославија, за да не падне во рацете на окупаторот, во собирната акција на храна и облека за воените плници сместени во германскиот логор во Куманово и др. Особена активност пројавува во подготовките за формирањето на првите кумановски партизански одреди –Козјачкиот и Карадачкиот.

На 12 Октомври 1941 година станал борец на Карадачкиот партизански одред. Загинал на 14 Октомври 1941 година во реонот на селото Белановце при борбата на одредот против многубројната и подобро вооружена бугарска окупаторска војска и полиција.